Pilemon Leta Polɨmna Ɨrɨki Pilemonɨm pɨlwa Leta

Isɨpkita Yɨtkak

Onggɨtyam Pilemon Leta ɨrɨka rɨga re Polte. Ɨ Pol ɨtemb leta yɨrɨkonj re Pilemonɨm pɨlwa na yet re ti rɨga yɨbnonj Kolosai taunɨnd. Sɨ bꞌogla ama rɨka A.D. pipti nain dɨde siksti wan (59-61) kemag gangga nat yɨrɨkonj.

Pilemonɨmna wɨko rɨga Onesimo yurowam ke wulkɨp akasinonj Pilemonɨm pɨlke, dɨde ket bꞌɨkonj Roma taun wa. Sɨ re ket ton Roma taun wa yɨbnonj, ton ket ademb de Polɨnd yodaronj, ɨ dɨde ket kea gar ke utkunda rɨga awonj. Seg Pol ket Onesimond onggɨt leta kɨma yɨtmɨkitonj Pilemonɨm pɨlwa. Ɨ Pol ket Pilemonɨnd yɨtenawonj da, “Man bꞌogla Onesimomna negɨr mɨle awɨr tamninyɨt, ɨ ɨja na ket yɨr ɨpket ɨt re Kerisom pɨlɨnd gar ke utkunda yɨnggan re dɨde. Ajɨ goro odede wɨp yɨr ɨpkɨm ɨt re bꞌɨkeni wɨko rɨga re dɨde.”

Onggɨtyam kutkut leta dɨde nɨnda leta opi re Epeso, Kolosai, ɨ dɨde Pilipo re odede wɨp ogenaya im da “Sɨbɨbmet Leta”. Mop nokɨp opimemb leta ɨrɨki re Polɨmna im, re ton yiyata kɨma naskajog sɨbɨbmetɨnd yɨbnonj de Roma taun wa.

Philemon

Simesime Yɨtkak

1Simesime! Kon Pol yete re sɨbɨbmet rɨga nɨbnyɨn Keriso Yesu map, dɨde meraina gar ke utkunda rɨga Timote, sɨn ɨtemb leta yɨrɨkya re Pilemon mor pɨlwa e yete re man sowa ɨmɨnjog gar ke singi iyeni rɨga mɨbnyɨt dɨde sowa wɨkomad e mɨbnyɨt, 2ɨ sowa ngɨmɨr Apiyam pɨlwa, ɨ sowa geja rɨga pɨla danda kɨma wɨkomad Arkipom pɨlwa, ɨ dɨde kwa onggɨt sosim pɨlwa rɨnte re bꞌeoma yokateneny moina metɨnd. 3Wurar dɨde ngɨmbla wɨn kɨma mera Bꞌu Godɨm pɨlke dɨde Yonggyam Yesu Kerisom pɨlke.

Godɨm pɨlwa Sɨteket Yɨt Pilemonɨm gatab

4Ɨ ita wɨnɨnd ɨte re kon men nyɨ muwatenyɨn yɨr opmita wɨnɨnd, kon ɨta mor gatab kor Bꞌu Godɨnd sɨteket yɨt yomnɨkenenyɨn. 5Mop nokɨp kon ɨta utkundenenyɨn moina singi bꞌiyena mɨle gatab dɨde gar ke utkunda mɨle gatab yɨt. Sɨ man re bꞌobogɨl im singi eyeninyɨt Godɨmna yɨna rɨga, ɨ dɨde man ɨta Yonggyam Yesum pɨlɨnd danda kɨma gar ke utkunda yoramitenyɨt. 6Ɨ kon kwa yɨr opmitenenyɨn da man bꞌogla danda kɨma moina gar ke utkunda mɨle yingg iyenenyɨt rɨga wa yɨrkokar okatam, sɨ man ɨdenatemb komkesa bꞌogɨl gasa kupka wumɨrjog tauket rɨnsim re sɨn omnɨka eyenindam Kerisom esourenam. 7Sɨ moina singi bꞌiyena mɨlet ma sobijog na gar samɨm dɨde bꞌugowam nomnenenyɨm, mop nokɨp kor gar ke utkunda yɨnggan, man kea yɨna rɨga waina kukɨp ngɨmbla amnɨkeneninyɨmɨt.

Onesimom gatab Bꞌarkita Yɨt

8Ɨ kon re Kerisomna ɨtmɨkitijog rɨga nyɨ kɨma en. Sɨ onggɨt paemb kor ɨta ukoijog danda nɨbnau moga kesa men ingawam onggɨtyam mɨle omnɨkam rɨnte ra man bꞌogla omnɨket. 9Ajɨ yu kon, Pol re ke mid en, dɨde sɨbɨbmet nate nɨbnyɨn Keriso Yesu map. Sɨ kon ma ingawa yɨt e motɨnyɨn, ajɨ kon bꞌɨtena oramisɨn mor pɨlwa ra singi bꞌiyena mɨle kɨma e. 10Sɨ onggɨt paemb kon men mɨtenaen kor bꞌɨga Onesimom gatab yet re koina bꞌɨgam awonj re kon sɨbɨbmetɨnd nɨbnenenond. 11Sɨ naskand ton re mor pɨlwa negɨr mɨle omnɨka rɨga na yɨbnonj, ajɨ yu ton re kea mor pɨlwa dɨde kor pɨlwa bꞌogɨl yɨm bꞌakawa rɨga e aeny. 12Ɨ ton re koina gar ke nony ɨjai rɨga e yɨbɨm, ajɨ kon tin ɨta ɨtmɨkisɨn mor pɨlwa. 13Mop nokɨp yu kon God ma bꞌogɨl yɨrkokar bage yɨt mapae sɨbɨbmetɨnd ɨjobɨki nɨbnyɨn, sɨ kon singi en da man bꞌogla metket kor pɨlwa ken yɨm okaenam. Ajɨ mor awɨr e nya ainy ken yɨm okaenam. Sɨ kor ɨja e ukoijog singi ainy da kon tin owama iyenyɨn dɨkɨnd sɨbɨbmetɨnd kon kɨma, nokɨm da ɨdenat ton onggɨtyam moina yɨm bꞌakawa pɨpmet okas ken yɨm okaenam. 14Ajɨ kon ma singi en moina ɨmjati kesa koina singi rɨrɨrɨnd jabajaba Onesimond owamam dɨkɨnd ken yɨm okaenam. Nokɨm da ke moina bꞌogɨl wɨko maka koina ɨl ongka ke rawɨk, ajɨ bꞌogla ra moinajog singi ke tawɨk. 15Nangga mop pena Onesimo bꞌɨkenonj mor pɨlke re mɨnda amaya God singi na da ton man kɨma wetaweta tainy sobijog ganggand, nokɨm da ɨdenat ton yɨmta ke tɨtenj mor pɨlwa man kɨma dadal ngɨrpu kesa wɨmenam. 16Nangga ma jɨ rada ton re moina wɨko rɨga e yɨbɨm, ajɨ ton ma rɨrɨr e yu jaba wɨko rɨga nena ɨbɨm naskand re dɨde. Mop nokɨp ton re kea gar ke utkunda rɨga na awonj. Sɨ ton kornɨm re ma sobijog singi iyena kɨma yɨnggan e au. Ɨ mornɨm tau ra bꞌusaya kwa ukoijog singi iyena kɨma gar ke utkunda yɨnggan e. Sɨ ton re gɨm ke moina wɨko rɨga e, ajɨ kwa ton re yɨpa moina gar ke utkunda yɨnggan e Yonggyamɨm pɨlɨnd. Sɨ ton re kea meraina gar ke utkunda yɨnggan e au.

17Sɨ onggɨt paemb rada man ɨta kon kɨma yɨpand bꞌinkenyɨt Yonggyamɨmna wɨkond, sɨ man bꞌogla ɨja na Onesimond simesime omnyɨt odede wɨp rɨja e re man ken simesime nomnɨkenenyɨt. 18Ɨ rada ton ke mor nangga negɨr na momnɨkawonj o mɨnda yurowam ke moina wulkɨp emjinonj, man bꞌogla tina bebɨg bꞌɨtɨsket kor pɨlwa kornɨm urowatam. 19Ɨ kon Pol ɨtemb ket koinajog yɨm kae mor peba mɨrɨkaen. Sɨ goro nony, kon ɨta mor mɨra mɨtendaen dem tina bebɨg omnɨki gatab. Ajɨ kon ma nok mapae nindenyɨn da man yɨrkokar yokatot re koina wɨko kena. Sɨ onggɨt paemb man molenggyam re wɨngawɨnga ke kornɨm ɨtendam mɨra et. 20Sɨ gar ke utkunda yɨnggan! Yu man toko koina singi rɨrɨrɨnd Onesimond simesime yomnene Yonggyamɨm nyɨ kɨma. Ɨ ɨngkaemb kon okasɨn bꞌogɨl ɨsma, ɨ ket gar ngɨmbla okasɨn Keriso map.

21Ɨ kon ɨmɨnjog yɨmjasɨn da man ɨta koina yɨt rɨrɨrɨnd bꞌogɨl mɨle omnɨket Onesimom pɨlɨnd. Ɨ kwa kon wumɨr en da man ma onggɨtyam koina yɨt rɨrɨrkɨp mɨle nena e omnɨket, ajɨ man ɨta bꞌusaya mogjog ngole bꞌatɨndrɨket. Sɨ onggɨt paemb kon onggɨtyam leta mor mɨrɨkaen. 22Ɨ kwa yɨpa yɨt ɨte da man kor obai rum notngonjenaet. Mop nokɨp kon ɨta netken wa pɨlwa, ra God temjasiny waina yɨr opmita kor gatab sɨbɨbmet ke opendam.

Undwatapu Yɨtkak

23Ɨ Epapra yete re kon kɨma sɨbɨbmetɨnd yɨbɨm Keriso Yesu map, men madaemb yɨt momɨny. 24Ɨ kwa koina wɨkomadwar opi re Mak, ɨ Aristarko, ɨ Dema, ɨ dɨde Luk, toda men madaemb yɨt momnyi. 25Yonggyam Yesu Kerisomna wurar waina wɨngawɨnga kɨma.